Премьер-министрдің бірінші орынбасары Нұрлыбек Нәлібаев және Шығыс Қазақстан облысының әкімі Нұрымбет Сақтағанов Бұқтырма гидроэнергетикалық кешенін аралады. Олар станцияның өндірістік қуаттарын көріп, энергетикалық жабдықты жаңарту барысымен және даму жоспарларымен танысты.
Бұқтырма кешені өңірдің энергетикалық тұрақтылығын қамтамасыз ететін маңызды нысандардың бірі. Станция өндірген электр энергиясы «Қазцинк» компаниясының бірқатар кәсіпорнына және өңір елді мекендеріне жеткізіледі.
Гидроэлектр станциясының құрылысы 1953 жылы басталып, алғашқы гидроагрегат 1960 жылғы тамызда іске қосылды. Қазір мұнда әрқайсысының қуаты 75 МВт болатын тоғыз гидроагрегат жұмыс істейді, станцияның белгіленген қуаты — 675 МВт. Ұзындығы 380 метр, биіктігі 90 метр бөгет 8 балға дейінгі жер сілкінісіне есептелген.
2025 жылы станция 3 млрд кВт·сағ электр энергиясын өндірді. Бұл жоспарланған көрсеткіштен 30% жоғары. «Қазцинк» негізгі және қосалқы жабдықты жаңартуға 21,4 млрд теңге инвестиция салды: гидроагрегаттардың жұмыс дөңгелектері мен негізгі күштік трансформаторлар ауыстырылып, 220 кВ кернеуге арналған жаңа элегазды тарату құрылғысы іске қосылды.
Сондай-ақ гидрогенератор статорларының орамдарын ауыстыру жобасы жүзеге асырылып жатыр. Атқарылған жұмыстардан кейін станцияның белгіленген қуаты 45 МВт-қа өсті. 2019 жылы орнатылған цифрлық басқару пульті технологиялық параметрлерді бақылауға және гидроагрегаттардың қуатын реттеуге мүмкіндік береді.
Қазір кешенде жаңа буындағы жоғары вольтті ажыратқыштар орнатылып жатыр. Алдағы уақытта гидротехникалық құрылыстардың жай-күйін автоматты бақылау және диагностикалау жүйесін енгізу, сондай-ақ гидрогенераторларды жаңғыртуды жалғастыру жоспарланған.
«Қазцинктің» экологиялық бағдарламасы аясында өңір су айдындарына жыл сайын балық жіберіледі. Биыл Бұқтырма су қоймасына тұқының 136 мыңнан астам шабағы жіберілді. Кешенде шамамен 200 адам жұмыс істейді.
Премьер-министрдің бірінші орынбасары «Қазцинк» басшылығына Бұқтырма ГЭС-ін жаңғырту және оның қызметкерлерінің жалақысын көтеру міндетін қойды.
