Бас көлік прокуратурасы, «ҚазТрансОйл» АҚ, уәкілетті мемлекеттік органдар және «Қазақстан-Қытай Құбыры» ЖШС бірлесіп жүргізген жұмыстардың нәтижесінде мемлекеттік бюджетке 3,3 млрд теңге салық түсті.
«ҚазТрансОйл» АҚ бастамасымен СТ РК 1474-2016 «Магистральдық мұнай құбырлары. Мұнайды есепке алу жөніндегі нұсқаулық» ұлттық стандартына өзгерістер енгізілді. Олар мұнай тасымалдау кезінде өлшеу құралдарының рұқсат етілген метрологиялық қателігінен пайда болатын мұнай артығын магистральдық құбыр иесінің кіріске алу тәртібін белгілейді.
Өзгерістер 2024 жылғы 1 наурызда күшіне енді. Олар мұнайдың тиісті көлемін есепке алуды жетілдіруге нормативтік негіз қалыптастырды.
Бас көлік прокуратурасы магистральдық құбыр көлігіндегі заңдылықтың сақталуын талдау кезінде мұнай ресурстарын дұрыс есепке алу және салық міндеттемелерін орындау мәселелеріне назар аударды. Бірлескен жұмыс жаңартылған стандарт пен бухгалтерлік және салық заңнамасының талаптарын іске асыруға мүмкіндік берді.
Келісілген іс-қимыл нәтижесінде «Кеңқияқ – Құмкөл» магистральдық мұнай құбырында 92 мың тонна мұнай артығы кіріске алынып, соған тиесілі 3,3 млрд теңге салық бюджетке төленді. Қазір осындай шаралар «Атасу – Алашанькоу» құбырында жүргізіліп жатыр.
«ҚазТрансОйл» АҚ мәліметінше, компания және оның еншілес әрі бірлесіп бақыланатын ұйымдары 2025 жылы Қазақстан бюджетіне 66,1 млрд теңге салық және басқа да міндетті төлем аударған.
