Мәскеуде II Ашық Еуразиялық «Бриллиантовая бабочка» кинопремиясын табыстау рәсімі өтті. Қазақстандық кинематографистер екі номинацияда жеңімпаз атанды.
Жасұлан Көпберген Думан Еркімбектің «QAITADAN» фильміндегі басты рөлі үшін үздік актер атанды. Александр Плотников Фархат Шәріповтің «Эвакуация» фильміндегі жұмысы үшін үздік оператор марапатын алды.
«QAITADAN» — Думан Еркімбектің дебюттік толықметражды туындысы. Фильмді Dala Cinema кинокомпаниясы Қазақстан Республикасы Мәдениет және ақпарат министрлігінің және Ұлттық киноны қолдау мемлекеттік орталығының қолдауымен түсірген. Мемлекеттік қолдаумен түсірілген қазақстандық фильмдердің ішінде оның кассалық түсімі 1 млрд теңгеден асқан алғашқы туынды болғаны айтылды.
