Қазақстан Премьер-министрінің орынбасары — көлік министрі Асел Жанасова Арменияға жұмыс сапары кезінде елдің вице-премьері Мгер Григорянмен және сыртқы істер министрі Арарат Мирзоянмен кездесті.
Кездесулердің негізгі тақырыбы Қазақстан үшін TRIPP (Trump Route for International Peace and Prosperity) көлік дәлізінің транзиттік мүмкіндіктері болды. Тараптар дәлізді дамыту перспективаларын, оның ішінде Транскаспий халықаралық көлік бағытымен (Орта дәлізбен) байланыстыру және халықаралық көлік-логистика желілеріне кіріктіру жолдарын талқылады.
Қазақстан Көлік министрлігінің хабарлауынша, TRIPP бағытын дамыту елдің Еуразияның көлік-логистика жүйесіндегі орнын нығайтуға, халықаралық дәліздерді әртараптандыруға, қосымша жүк ағындарын тартуға және өңірдегі логистикалық байланыстарды кеңейтуге мүмкіндік береді.
