2 қарашада Алматыда Орталық Азиядағы экономикалық ынтымақтастық жөніндегі Екінші Тянь-Шань форумы аясында Қазақстан және Қытай өкілдерінің кездесуі өтті. Оған Премьер-Министрдің орынбасары – Ұлттық экономика министрі С.М. Жұманғарин, Қытай қаржы министрі Лань Фоань, Қазақстан қаржы министрі М.Т. Такиев және екі елдің қаржы институттары мен ұйымдарының өкілдері қатысты.
Тараптар инвестициялық ағындарды кеңейтуге, ортақ қаржы құралдарын дамытуға және Қазақстан үшін стратегиялық маңызы бар жобаларды іске асыруға бағытталған қаржы ынтымақтастығының жаңа форматтарын талқылады.
Күн тәртібіндегі негізгі мәселелердің бірі — Қазақстан және Қытай қаржы институттарының қатысуымен бірлескен тікелей инвестициялар қорын құру мүмкіндігі. Сондай-ақ үлестік, борыштық және сақтандыру арқылы қаржыландыру тетіктерін біріктіру мәселесі қаралды.
