Астанада Қазақстанның энергетика министрі Ерлан Ақкенженов Қытай ұлттық мұнай-газ корпорациясының (CNPC) президенті Чжоу Синьхуаймен кездесті.
Тараптар мұнай-газ саласындағы Қазақстан мен Қытай ынтымақтастығын дамытуды, соның ішінде мұнай өңдеу қуаттарын ұлғайту және газ-химия жобаларын дамыту мәселелерін қарастырды.
Ақкенженов CNPC 30 жылдан астам уақыт бойы Қазақстанның негізгі стратегиялық серіктестерінің бірі екенін атап өтті. Оның айтуынша, геологиялық барлау, өндіру, тасымалдау және көмірсутектерді өңдеу салаларындағы бірлескен жобалар ел экономикасының дамуына үлес қосып келеді.
Кездесуде «ПетроҚазақстан Ойл Продактс» ЖШС өндірістік қуатын кеңейту жобасына назар аударылды. 2025 жылдың күзінде Қазақстан Президентінің Қытайға сапары кезінде тараптар Шымкент мұнай өңдеу зауытын жылына 6 млн тоннадан 12 млн тоннаға дейін кеңейту жобасын жеке бастама ретінде қарастыруға келіскен.
Тараптар жобаның қазіргі мәртебесі мен оны ілгерілету жөніндегі келесі қадамдарды талқылады. Кездесуде келісімшарттық міндеттемелерді орындау, жергілікті қамту үлесін арттыру және кадрлық әлеуетті дамыту мәселелері де сөз болды.
Тараптар өндірістік мүмкіндіктерді кеңейтуге, Қазақстанның энергетикалық қауіпсіздігін нығайтуға және Қазақстан мен Қытайдың стратегиялық әріптестігін дамытуға бағытталған жұмысты жалғастыруға мүдделілік білдірді.
