Қазақстан мен Германия агроөнеркәсіп кешеніндегі практикалық ынтымақтастықты кеңейтуді жоспарлап отыр. Екіжақты серіктестік перспективалары және өзара іс-қимылдың жаңа кезеңінің басымдықтары Қазақстан-герман аграрлық-саяси диалогының отырысында талқыланды.
Жиынға ауыл шаруашылығы вице-министрі Таласбек Канафин, Германия Федеративтік Республикасының Ауыл шаруашылығы, азық-түлік және өңірлік бірегейлік федералдық министрлігінің парламенттік мемлекеттік хатшысы Мартина Энгльхардт-Копф, Германияның Қазақстандағы төтенше және өкілетті елшісі Хайке Ренате Пайч, екі елдің аграрлық сала ғалымдары, Германия фермерлер одағы мен агробизнес өкілдері қатысты.
Таласбек Канафиннің айтуынша, 2009 жылдан бері жұмыс істеп келе жатқан диалог тәжірибе алмасуға, салалық саясаттың өзекті мәселелерін талқылауға және практикалық шешімдер әзірлеуге арналған алаңға айналды. Диалогтың алтыншы кезеңі 2026 жылғы қыркүйекте басталды. Ол өңірлік ынтымақтастықты кеңейтіп, Орталық Азиядағы аграрлық саясат бойынша сараптамалық байланысты дамытуға бағытталған.
