Қазақстанның Экология және табиғи ресурстар министрі Әлибек Қуантыров Астанада өтіп жатқан Қазақстан мен Тәжікстан бизнес-форумына қатысты. Іс-шара Тәжікстан президенті Эмомали Рахмонның Қазақстанға ресми сапары қарсаңында ұйымдастырылды.
Форумда екіжақты тауар айналымын, өнеркәсіпті, ауыл шаруашылығын, цифрлық экономиканы және сауданы дамыту, ақпараттық технологиялар, IT қауіпсіздігі және жасанды интеллект, жаңартылатын энергия көздері саласындағы бірлескен жобалар, сондай-ақ инвестициялық ынтымақтастықты кеңейту мәселелері талқыланды.
Тәжікстанның энергия қуаттарының 98 пайызы жаңартылатын энергия көздеріне тиесілі. Олардың басым бөлігін су электр станциялары құрайды.
Қазақстанда жаңартылатын энергия көздері нысандары өндіретін электр қуатын арттыру және жаңартылатын энергетиканы дамыту шаралары жүзеге асырылып жатыр. Елдің энергия жүйесінде 254 энергия көзі бар, оның 172-сі — жаңартылатын энергия нысандары. Жалпы белгіленген қуаты 27,1 ГВт, соның ішінде жаңартылатын энергия нысандарының қуаты — 3,8 ГВт.
Ағымдағы жылдың тоғыз айының қорытындысы бойынша жаңартылатын энергия көздерінің электр энергиясын өндірудегі үлесі 8,5 пайызға жетті. Жоспарлы көрсеткіш 7 пайыз болған.
Қазақстанда күн энергетикасын дамыту басым бағыттардың бірі саналады. Жалпы қуаты 900 МВт болатын ірі күн электр станциялары жобаларының тізімі жасақталған. 2035 жылдың соңына дейін жаңартылатын энергия көздерінің кемінде 8,4 ГВт жаңа қуатын, оның ішінде шамамен 1,8 ГВт күн генерациясын іске қосу жоспарланған.
Форум аясында екі елдің іскер топтары экономиканың түрлі салаларында жалпы сомасы 135,3 млн АҚШ доллары болатын 11 келісімге қол қойды.
