Қазақстанда бизнеске арналған кейбір лицензиялар мен рұқсаттар автоматтандырылған жүйе арқылы бірден беріледі. Жүйе мемлекеттік дерекқорлардан мәлімет алып, талаптарға сәйкестігін өзі тексереді және шарттар орындалса, оң шешім шығарады.
Бұрын жекелеген лицензиялар мен рұқсаттарды алу 15-тен 30 күнтізбелік күнге дейін созылатын. Кәсіпкер құжат жинап, мемлекеттік органға тапсырып, тексеру мен шешімді күтуі керек еді.
Жаңа тәртіпте электрондық өтініш беру жеткілікті. Шешім қызметкердің қатысуынсыз, алдын ала белгіленген бірыңғай ережелер бойынша қабылданады.
Қазақстан Республикасы Жасанды интеллект және цифрлық даму министрлігі Мемлекеттік қызметтер комитетінің төрағасы Айнұр Юсупованың айтуынша, автоматты шешім қабылдау құрылыста, ауыл шаруашылығында, сыртқы саудада, өнеркәсіптік қауіпсіздікте, қоршаған ортаны қорғауда және басқа салаларда қолданылады.
2024 жылдан бері eLicense.kz порталы арқылы тексеруі және шешім қабылдауы автоматты түрде жүргізілген 87 088 мемлекеттік қызмет көрсетілген. Қазір мұндай тетік бизнеске арналған 12 мемлекеттік қызметте жұмыс істейді.
Алдағы уақытта цифрлық деректер мен белгіленген талаптар негізінде шешім қабылдауға болатын басқа мемлекеттік қызметтерге де осы тәсіл енгізіледі.
