Қазақстан Республикасы Атом энергиясы агенттігінің төрағасы Алмасадам Сәтқалиев бастаған делегация Түркия Республикасындағы «Аккую» АЭС құрылыс алаңын аралады.
Делегация энергоблоктар құрылысының барысымен, құрылыс жұмыстарын ұйымдастырумен және пайдалану персоналын даярлаумен танысты. «Аккую Нуклеар» АҚ бас директоры Сергей Буцких және компания басшылығының өкілдері жобаның қазіргі жай-күйі туралы ақпарат берді.
Қабылдаушы тараптың мәліметінше, бірінші энергоблоктың негізгі жүйелері іске қосу операцияларына жоғары деңгейде дайын. Реактор қондырғысының бірінші және екінші контурларының гидравликалық сынақтары аяқталып, қорғаныш қабығының беріктігі мен герметикалығы жобалық талаптарға сәйкес екені расталды.
Екінші энергоблокта реактор қондырғысының негізгі жабдықтары монтаждалып, басты циркуляциялық құбырды дәнекерлеу аяқталған. Турбинаны құрастыру жалғасып жатыр. Үшінші блокта реактор қондырғысының негізгі құрамдас бөліктері орнатылып, турбина ғимаратында жұмыстар жүргізілуде. Төртінші блокта турбоагрегат іргетасының құрылысы аяқталып, ішкі қорғаныш қабығын құрастыру жалғасуда. Энергоблоктарды пайдалануға бір жыл аралықпен беру жоспарланған.
Делегация бірінші энергоблоктың блоктық басқару пунктін, жағалаудағы сорғы станциясын және электр қуатын беру жүйесінің орталық басқару қалқанын көрді. Сондай-ақ «Аккую» АЭС оқу-жаттығу орталығында жедел персоналды оқыту жүйесі және мамандарды тәжірибелік даярлау таныстырылды.
Агенттік мәліметінше, сапар Қазақстанның атом энергетикасын дамыту үшін қызығушылық тудыратын ірі атом энергетикасы жобасын жүзеге асыру тәжірибесімен танысуға мүмкіндік берді.
