Қазақстан Ауыл шаруашылығы министрлігінде Жер ресурстарын басқару комитетінің төрағасы Мұрат Теміржанов Германияның Қоршаған орта мәселелері жөніндегі тәуелсіз институтының (UfU) делегациясымен кездесті.
Тараптар Қазақстанда көміртекті егіншілікті дамыту, топырақ құнарлылығын сақтау және ауыл шаруашылығы жерлерін тұрақты басқару әдістерін енгізу перспективаларын талқылады. Неміс делегациясының құрамында институттың регенеративті жер пайдалану және климаттық тұрақтылық департаменті басшысының орынбасары Сами Чельтикоглу және Орталық Азиядағы өкілдіктің басшысы Алия Мусина болды.
Кездесуде ауыл шаруашылығы саласының тұрақты дамуына ықпал ететін бағыттардың бірі ретінде көміртекті егіншілікті ілгерілету мүмкіндіктері қаралды. Сондай-ақ ауыл шаруашылығы мақсатындағы жерлерді ұтымды пайдалану және тозған алқаптарды қалпына келтіру мәселелері көтерілді.
Тараптар көміртекті жобаларды іске асырудың құқықтық негіздерін, парниктік газдар шығарындыларын азайтуды, топырақтағы органикалық көміртек қорын арттыруды және жер ресурстарын тұрақты басқарудың заманауи тәсілдерін енгізуді талқылады.
Қазақстанның табиғи-климаттық және аграрлық ерекшеліктерін ескере отырып, халықаралық тәжірибені қолдануға, ғылыми-практикалық ынтымақтастықты дамытуға және көміртекті егіншілік бастамаларын іске асыру тетіктерін әзірлеуге назар аударылды.
Практикалық шешімдерді енгізуге арналған негізгі алаңдардың бірі ретінде «ГИПРОЗем» РМК-ның ғылыми әлеуетін пайдалану мүмкіндігі қарастырылды. Кездесуге қатысушылар кәсіпорынның зерттеу мүмкіндіктері мен жер ресурстарын зерттеуде жинақтаған тәжірибесі бірлескен бастамаларға көмектесе алатынын атап өтті.
Кездесу қорытындысында тараптар көміртекті егіншілікті дамыту, жер ресурстарын тұрақты басқару және топырақ сапасын жақсарту бағыттарындағы ынтымақтастықты нығайтуға мүдделі екенін білдірді.
