Энергетика министрі Ерлан Ақкенженов Құрылтайдағы Экономикалық саясат, өнеркәсіп және энергетика комитетінің отырысында электр энергетикасының жай-күйі және саланы дамыту жоспарлары туралы баяндады.
Қазақстан 2029 жылдың соңына дейін 13,3 ГВт жаңа генерация қуатын іске қосуды жоспарлап отыр. Оның 7,4 ГВт-ы базалық генерация болады. Министрдің айтуынша, жобалар халық пен экономиканың болжамды сұранысын өтеуге және генерация қуатының 20 пайыздық профицитін қалыптастыруға мүмкіндік береді.
2027 жылы жаңа қуат көздерінің іске қосылуы нәтижесінде электр энергиясының профициті 1,3 млрд кВт·сағ болады деп күтілуде. Сонымен қатар, елдің 2035 жылға дейінгі энергетикалық теңгерімін жаңарту жұмыстары жүргізіліп жатыр.
Жарнама
Жаңартылатын энергия көздерінің үлесі электр энергиясын өндірудің жалпы көлемінде 8,5 пайызға жетті. Күн электр станцияларының ірі жобаларының жиынтық қуаты 900 МВт болатын пул жасақталған.
2035 жылдың соңына дейін жаңартылатын энергия көздерінің кемінде 8,4 ГВт жаңа қуатын, оның ішінде шамамен 1,8 ГВт күн генерациясын іске қосу жоспарланған.
Көмір генерациясын дамыту жөніндегі ұлттық жоба аясында шамамен 7,8 ГВт қуатты іске қосу және жаңарту көзделген. Сегіз жаңа станция салу және қолданыстағы 11 энергия көзін жаңғырту жоспарланып отыр.
