Қазақстанның Өнеркәсіп және құрылыс министрі Ерсайын Нагаспаев Үкіметтегі баспасөз мәслихатында жаңа өнеркәсіп өндірістерін іске қосу жоспарлары және өндірістік қуаттар теңгерімін бағалаудың жаңа әдістемесі туралы айтты.
Мемлекет басшысының Жолдауына сәйкес, 2030 жылға дейін өңдеу секторында шамамен 600 жаңа инвестициялық жоба іске асырылады. Өткен жылы 190 жоба іске қосылды. Биыл жыл соңына дейін 200 жобаны іске қосу жоспарланған, оның 116-сы қазірдің өзінде жүзеге асырылды.
Перспективалы жобалардың қатарында Қарағанды және Абай облыстарындағы екі мыс балқыту зауыты, Павлодар облысындағы «Ертіс» гидрометаллургиялық комбинаты және Жамбыл облысындағы «ЕвроХим-Қаратау» өндірістік кешені бар. Сондай-ақ Батыс Қазақстан облысында калий тұздарын, Маңғыстау облысында аммиак-карбамид өнімдерін шығаратын кешен салу маңызды екені айтылды.
Министрдің сөзінше, Қостанай облысындағы KIA Kazakhstan автомобиль кәсіпорны мен Алматыдағы көп брендті зауыттың айналасында шағын және орта бизнес кластері қалыптасып келеді. Қазақстандық кәсіпорындар автокомпоненттер, мультимедиа жабдықтарын, орындықтар мен сым жгуттарын және басқа өнімдерді шығарады.
Нагаспаев металлургия саласындағы өндірістік қуаттар теңгерімсіздігіне жол бермеу жөніндегі Президент тапсырмасына да тоқталды. Қазақстанда өндірілетін болаттың шамамен 80%-ын шығаратын «Qarmet» компаниясы мысал ретінде аталды. Жаңа кәсіпорын ашудың орындылығы ерекше бақылауға алынған.
Осы мақсатта Кәсіпкерлік кодексіне және «Өнеркәсіптік саясат туралы» заңға өзгерістер енгізіліп, өндірістік қуаттар теңгерімін бағалау тетігі қарастырылды. Министрлік әзірлеп, бекіткен әдістеме қолданыстағы қуаттарды, ішкі нарық қажеттілігін және өнімді экспорттау мүмкіндігін ескереді.
Бағалау нәтижелері мемлекеттік қолдау көрсету кезінде де ескеріледі. Министрдің айтуынша, бұл тәсіл Қазақстандағы барлық өнеркәсіптік жобаларға қолданылады.
