Қазақстандық ғалымдар Гарвард университетіне ғылыми іссапары кезінде Хоутон кітапханасының қорындағы MS Turk 70 коллекциясынан 1599–1742 жылдарға жататын жеті тарихи актіні зерттеді. Құжаттарда Яркенд хандығы мен Шығыс Түркістандағы мемлекеттік басқару жүйесі, жер қатынастары, тархандық және сойырғал беру тәжірибесі туралы мәліметтер бар.
Іссапар «Қазақстанның қолжазба мұрасы: есепке алу, қалпына келтіру, ғылыми каталогтау, цифрландыру және кешенді кодикологиялық зерттеу» бағдарламасы аясында ұйымдастырылды. Бағдарлама Қазақстанда сақталған қолжазбалар мен сирек кітаптарды есепке алуды, қалпына келтіруді, сипаттауды және цифрландыруды көздейді.
Жобаны «Ғылым ордасы» республикалық мемлекеттік кәсіпорны үйлестіреді. Оған Қожа Ахмет Ясауи атындағы Халықаралық қазақ-түрік университеті мен Astana IT University қатысады. Гарвард университетінің Дэвис атындағы Ресей және Еуразия зерттеулер орталығы халықаралық ғылыми серіктес ретінде жұмыс істейді.
Іссапарға Қожа Ахмет Ясауи атындағы Халықаралық қазақ-түрік университетінің алты зерттеушісі және «Ғылым ордасының» алты өкілі, оның ішінде Орталық ғылыми кітапхананың төрт маманы қатысты. Олар Гарвард университеті мен АҚШ Конгресс кітапханасының қорларында деректанулық және библиографиялық зерттеулер жүргізді.
Зерттеушілер жоба тақырыбына қатысты Хоутон кітапханасының 22 библиографиялық жазбасын салыстырып, тарихи деректерді есепке алу, каталогтау және ғылыми айналымға енгізу жөніндегі 70 ғылыми және анықтамалық материалдан тұратын тізім жасады. Сондай-ақ олар Гарвард кітапханаларында сирек кітаптар мен қолжазбаларды сақтау, каталогтау және цифрландыру тәжірибесімен танысты.
Дэвис орталығында өткен From Shelves to Scholarship семинарында қазақстандық тарап жұмыс нәтижелерін таныстырды. «Ғылым ордасы» бас директорының орынбасары Азамат Нұршанов бағдарлама барысы туралы баяндады: 2026 жылғы қазанның басындағы жағдай бойынша 1 510 қолжазба мен сирек кітап цифрландырылып, араб графикасындағы 417 сирек басылым ғылыми өңдеуден өткен.
Іссапар кезінде бірлескен зерттеулер, ғылыми жарияланымдар және академиялық алмасуды жалғастыру мәселелері талқыланды. Гарвард университетінің халықаралық байланыстар жөніндегі вице-провосты, профессор Марк К. Эллиотт қазақстандық делегацияны қабылдады. Оған Ясауи университетінің Еуразиялық ғылыми-зерттеу институты дайындаған «Ұлыс Жошы тарихына қатысты ресми құжаттар» жинағы табысталды.
