Майлы дақылдарды өңдеушілердің ұлттық қауымдастығы (НАПМК) және оған кіретін кәсіпорындар 5–10 қарашада Шанхайда өтіп жатқан 9-шы Қытай халықаралық импорт көрмесіне қатысты. Қазақстанның ұлттық стендінде Қытай нарығында сұранысқа ие май өнімдері ұсынылды.
Қазақстан Қытайға май өнімдерін жеткізушілер арасында позициясын нығайтып келеді. 2025 жылдың қорытындысы бойынша ел Қытайға күнбағыс майын экспорттау көлемінен екінші орын алып, күнбағыс шротының ірі жеткізушілері арасында үздік үштікке кірді. 2024–2025 жылдары рапс майын жеткізушілер арасында үздік бестікке тұрақты түрде енді.
Соңғы үш маусымда Қытайға өсімдік майы мен шрот және күнжара экспорты 3,7 еседен астам өсті. Өткен маусымда жеткізілім көлемі 657 мың тоннаға жетіп, жалпы құны 438 млн АҚШ долларынан асты.
НАПМК мәліметінше, нәтижеге қауымдастықтың «Қазақстан темір жолы» ұлттық компаниясымен бірлескен жұмысы да ықпал етті. 2024 жылғы ақпаннан бері Достық – Алашанькоу шекара өткелі арқылы Қытайға өсімдік майын жөнелтуге арналған теміржол жоспарларын бөлу тетігі жетілдіріліп келеді. Келісілген жоспарлардың орындалуы 90%-дан асты; 2023 жылы бұл көрсеткіш 40%-ға да жетпеген.
Биыл көктемде НАПМК «Қазақстан темір жолы» және Қытай темір жолдары әкімшілігімен бірге түйіршіктелген күнбағыс шротын астық таситын вагондармен жөнелту бойынша пилоттық жобаны іске қосты. Қауымдастықтың бағалауынша, жоба экспортты ұлғайтуға қосымша мүмкіндік береді.
НАПМК алдағы екі маусымда Қазақстанның Қытайға май өнімдері экспорты 1 млн тоннаға жетеді деп болжайды. Бұған шикізат базасының кеңеюі, логистикалық инфрақұрылымды тиімді пайдалану және жаңа өңдеу кәсіпорындарының іске қосылуы ықпал етеді.
