Қазақстанның арнайы экономикалық аймақтарында (АЭА) металлургияға, энергетикаға және су тазартуға арналған химия және мұнай-химия өнімдері, сондай-ақ парфюмерия шығарылады. Салалық жобалар Павлодар, Жамбыл, Атырау облыстарында және елордада жұмыс істейді.
QazIndustry арнайы экономикалық және индустриялық аймақтарды дамыту дирекциясы негізгі жобалардың қатарында Павлодар АЭА-дағы «Каустик» және «УПНК-ПВ» кәсіпорындарын, Астана қаласындағы «Аромат» фабрикасын атады. «Каустик» хлор, каустикалық сода, натрий гипохлориті және тұз қышқылын өндіреді. Кәсіпорынның жылдық өндірістік қуаты — 98,5 мың тонна.
Павлодар АЭА-дағы «УПНК-ПВ» жылына 205 мың тоннаға дейін күйдірілген мұнай коксын шығарады. Өнім Қазақстанның электролиз зауытындағы анод өндірісіне жеткізіліп, ТМД елдеріне, Қытайға және басқа елдерге экспортталады. Кәсіпорын кокс күйдіруден бөлінетін жылуды электр энергиясына айналдырып, өз қажеттілігін қамтамасыз етеді және артығын нарыққа сатады.
