«ҚазТрансОйл» «Мартышы – Атырау» магистральдық мұнай құбырының 11,2–11,4 және 20,5–20,7 шақырымдарындағы қайта салынған учаскелерін А-27 «Ақтөбе – Атырау – Ресей Федерациясының шекарасы (Астрахань)» республикалық маңызы бар автомобиль жолымен қиылысатын жерде қосуды аяқтады.
Аққыстау кентін айналып өтетін жол қолданыстағы мұнай құбырын кесіп өтетіндіктен, оның учаскелерін жол құрылысына бейімдеп қайта салу қажет болды. Жұмыс өнеркәсіптік қауіпсіздік және құбырды сенімді пайдалану талаптарын сақтай отырып жүргізілді.
Диаметрі 530 мм құбырдың ұзындығы 238,86 және 287,2 метр болатын екі учаскесі салынды. Құрылымның беріктігі мен ұзақ қызмет етуі үшін сыртқы коррозияға қарсы қорғанысы күшейтілген құбырлар қолданылып, жолмен қиылысатын жерге болат қорғаныш қаптама орнатылды.
