Алматы облысында жұмыс берушілер 4 300-ден астам бос жұмыс орнын ұсынады. Enbek.kz порталының дерегіне сәйкес, өңірде білім беру, өнеркәсіп, сауда, логистика және медицина мамандарына сұраныс жоғары.
Білім беру саласында 532, өнеркәсіпте 319, біліктілікті қажет етпейтін жұмыстарда 212, көлік және логистикада 204, медицина мен фармацевтикада 133 вакансия ашылған.
Ұсынылатын жалақы маманның білімі мен тәжірибесіне және жұмыс берушінің кадрларға деген сұранысына байланысты. Бас инженерлерге, энергетиктерге, өндіріс және қаржы бөлімшелерінің басшыларына, автоматтандыру саласының кейбір мамандарына, сондай-ақ жүк көлігі мен автопойыз жүргізушілеріне 800 мыңнан 1 млн теңгеге дейін жалақы ұсынылады.
Білім беру саласында математика, орыс тілі мен әдебиеті, информатика, физика, химия, шет тілі және қазақ тілі мұғалімдері қажет. Оларға 391 мыңнан 600 мың теңгеге дейін және одан жоғары жалақы ұсынылады.
Өнеркәсіп пен құрылыста инженерлерге, жабдық жөндеу және электрмен жабдықтау мамандарына, дәнекерлеушілерге, металл конструкцияларын құрастырушыларға және құрылыс-монтаж жұмыстарының шеберлеріне сұраныс бар. Олардың жалақысы 500–600 мың теңгеден асады, ал кейбір инженерлік-техникалық қызметтерде 800 мың теңгеге және одан жоғарыға жетеді.
Қаржы саласында бухгалтерлер, қаржыгерлер, қазынашылар және басқа мамандарға арналған вакансиялар бар. Кейбір ұсыныстар бойынша жалақы 400 мыңнан 800 мың теңгеге дейін. Сондай-ақ денсаулық сақтау, еңбек қауіпсіздігі және өнеркәсіптік қауіпсіздік, өндірісті автоматтандыру, сапаны бақылау және сауда салаларының мамандары ізделіп жатыр.
Өнеркәсіп пен құрылыстың дамуы, цифрлық технологиялар мен автоматтандырудың енгізілуі және әлеуметтік қызметтердің кеңеюі алдағы жылдары мамандарға сұранысты тұрақты ұстайды деп күтіледі. Әсіресе инженерлік-техникалық және жұмысшы мамандықтарының маңызы артады.
Цифрлық технологиялардың дамуына байланысты бағдарламашыларға, деректер талдаушыларына және киберқауіпсіздік мамандарына қажеттілік өседі. Электрондық еңбек биржасының дерегінше, 2026–2035 жылдары ел экономикасына шамамен 2,9 млн маман қажет болады, олардың жартысынан астамы жұмысшы кәсіптерінің өкілдері.
