Қазақстанда АЭС құрылысы аясында Үлкен кентін кешенді дамыту және онда тұрғын үй мен әлеуметтік инфрақұрылым салу жоспарланып отыр. Бұл туралы Қазақстан Республикасы Атом энергиясы агенттігінің төрағасы Алмасадам Сатқалиев Түркиядағы «Аккую» АЭС-інде жұмыс істейтін қазақстандық мамандармен кездесуде айтты.
Оның сөзінше, 33 мыңға дейін адам тұратын атомшылар қалашығы қазіргі кенттің құрамына енгізіледі. Мұнда тұрғын үйлер, мектептер, медициналық нысандар, кадрларды даярлау және қайта даярлау орталықтары салынып, қонақүй инфрақұрылымы, қызмет көрсету саласы және бизнес дамытылады.
Сатқалиев бұл жеке жұмысшылар кенті болмайтынын, Үлкеннің өмір сүруге қажет инфрақұрылымы бар кешенді дамуы көзделгенін атап өтті. АЭС құрылысы үшін салынатын нысандарды жұмыс аяқталғаннан кейін кент қажетіне және кәсіпкерлікті дамытуға пайдалану жоспарланған.
Жоспарда заманауи цифрлық шешімдерді енгізу де бар. Агенттік басшысының айтуынша, Үлкенді Балқаш жағалауындағы озық елді мекендердің біріне айналдыру көзделіп отыр. Кенттің табиғаты мен орналасуы демалыс және туризмді дамытуға мүмкіндік береді.
Болашақ АЭС қызметкерлерін даярлау, қайта даярлау және біліктілігін арттыру үшін оқу-жаттығу орталығын орналастыру жоспарланған. АЭС құрылысының ең қызған кезеңінде бір станцияға 15 мыңға дейін жұмысшы қажет болады, ал оны пайдалануға шамамен 2 мың маман тартылады.
Кадрлар Қазақстанның бейінді оқу орындарымен, сондай-ақ Қытай мен Ресейдің профильді білім беру ұйымдарымен ынтымақтастық арқылы даярланады. Бұған қоса, атом саласы қызметкерлері «Болашақ» халықаралық стипендиялық бағдарламасы бойынша магистратурада, докторантурада оқып, шетелдік ұйымдарда тағылымдамадан өте алады.
Сатқалиев Үлкеннің дамуы жастарға жұмысқа орналасуға және мансап құруға жаңа мүмкіндіктер беретінін айтты. Оның сөзінше, мамандар баспанамен қамтамасыз етіледі.
