Астанада дәстүрлі «Соғым-FEST» ет жәрмеңкесі басталды. Қаладағы үш алаңда еліміздің өңірлерінен келген фермерлер өнімдерін қолжетімді бағамен ұсынып жатыр.
Жәрмеңкені Астана қаласының Сауда және тұтынушылардың құқықтарын қорғау департаменті және Инвестициялар және кәсіпкерлікті дамыту басқармасы ұйымдастырды. Оған Қарағанды, Ақмола, Павлодар және Абай облыстарынан, сондай-ақ елдің оңтүстік өңірлерінен фермерлер келген.
Жәрмеңкеде сиыр етінің келісі 3 300 теңгеден, жылқы еті 3 500 теңгеден, қой еті 3 700 теңгеден сатылады. Ұсынылған өнімнің барлығы зертханада қауіпсіздік тексеруінен өтеді.
Астана қаласының Сауда және тұтынушылардың құқықтарын қорғау департаменті бағаның сақталуын қадағалайды. Ет әлеуметтік маңызы бар азық-түлік тауарларының тізіміне кіреді, оған қосылатын сауда үстемесі 15%-дан аспауы керек.
Өткен жылдардағы тәжірибе бойынша жәрмеңкеде аптасына орта есеппен 150-ден 200 тоннаға дейін ет сатылады. Ұйымдастырушылар маусым соңына дейін жалпы сату көлемі 1000 тоннадан асады деп күтеді.
«Соғым-FEST» 2026 жылдың соңына дейін әр демалыс күндері сағат 09:00-ден 19:00-ге дейін үш жерде өтеді: Keruen Joly сауда орталығы — Алаш тасжолы, 35Б; «Ет Әлемі» — Алаш тасжолы, 31/1; Jurt — Бейбарыс Сұлтан көшесі, 3.
