Президент Қасым-Жомарт Тоқаев Теміртауға жұмыс сапары кезінде Qarmet акционерлік қоғамының ұжымымен және кәсіподақ мүшелерімен кездесті.
Тоқаев Қарағанды облысының экономикасы дамып келе жатқанын, ауыр өнеркәсіп кәсіпорындары 4,2 трлн теңгеге өнім өндіргенін айтты. Оның сөзінше, Qarmet былтыр 1,1 трлн теңге жалпы түсіммен таза пайдаға шыққан. Кәсіпорынды жаңғыртуға 2028 жылға дейін 3,5 млрд доллар бағыттау жоспарланған.
Президент компанияның Теміртауда трамвай қатынасын өз қаражатына толық қалпына келтіргенін және жас мамандарды оқытып, жұмысқа орналастыруға арналған «Болашаққа жол» бағдарламасын бастағанын атап өтті. Бағдарламаның алғашқы кезеңіне әр өңірден шамамен 500 адам қатысады.
