АҚШ президенті Дональд Трамп робототехника, өнеркәсіптік машиналар, сондай-ақ олардың бөлшектері мен құрамдас бөліктерінің импортына қатысты жарлыққа қол қойды. Құжат 1962 жылғы Сауда экспансиясы туралы заңның 232-бөліміне сәйкес қабылданған.
Жарлық АҚШ-тың Сауда министрі мен АҚШ сауда өкіліне осы тауарлардың кез келген елден келетін импортына байланысты ұлттық қауіпсіздікке төнетін қатерді азайту үшін сауда серіктестерімен бірлесіп келіссөз жүргізуді тапсырады.
Сауда министрі робототехника мен өнеркәсіптік машиналарға қатысты 232-бөлім бойынша қосымша шара қажет болуы мүмкін жағдайлар туралы президентке хабарлайды. Трамп АҚШ ұлттық қауіпсіздігіне төнетін қауіпті жою үшін импортты реттеуге бағытталған өзге де шаралар қабылдай алады.
Ақ үйдің мәліметінше, робототехника мен өнеркәсіптік машиналар қорғаныс, коммерциялық және қосарлы мақсаттағы заманауи өндірісте кеңінен қолданылады. Қазіргі қорғаныс жүйелері мен маңызды инфрақұрылым салаларының басым бөлігі осы технологиялар мен жабдықтарға тәуелді.
АҚШ көптеген салада өндіріс орындарына инвестициялардың өсуіне қарамастан, өзі тұтынатын робототехника мен өнеркәсіптік жабдықтың көлемінен аз өндіреді. Ел ішіндегі өндіріс сұраныстың артуын қамтамасыз ете алмайтындықтан, АҚШ бұл өнімдердің көп түрін шетелден импорттайды.
Ақ үй мұндай тәуелділік АҚШ-тың өнеркәсіптік базасы мен ұлттық қауіпсіздігіне қатер төндіріп, маңызды өнеркәсіп саласының ұзақ мерзімді бәсекеге қабілеттілігіне әсер етуі мүмкін деп мәлімдеді. Трамп әкімшілігі бұған дейін де 232-бөлім аясында бірқатар тауарларға баж енгізіп, оларды күшейткен.
