Түрікменстан президенті Сердар Бердімұхамедов Дашогуз уәлаятына жұмыс сапары кезінде Ашхабад–Дашогуз автомагистралінің, өсімдік майын өндіретін кәсіпорынның және азотты тыңайтқыштар кешенінің іргетасын қалау рәсімдеріне қатысты. Сондай-ақ цифрлық байланыс арқылы Түрікменбашы–Гарабогаз–Қазақстан шекарасы тасжолының Гарабогаз–шекара маңы учаскесіндегі 44 шақырымдық жолды пайдалануға қосты.
Ұзындығы 546 шақырым болатын Ашхабад–Дашогуз автомагистралі Солтүстік–Оңтүстік көлік дәлізінің бір бөлігі болуы тиіс. Ол астананы елдің солтүстік өңірімен байланыстырады. Жобада қолданыстағы 9 көпірді жаңғырту, ұзындығы 812 метр және ені 25 метр жаңа екі жолақты көпір салу, 136 аялдама, 13 автотұрақ және жол полициясының 7 бақылау бекетін орнату қарастырылған. Бейнебақылау және жылдамдықты бақылау жүйелері де қойылады.
Гарашсызлык этрабындағы май өндіретін кәсіпорын жылына 60 мың тонна техникалық мақта тұқымын өңдей алады. Ол тәулігіне 600 тонна шикізат қабылдап, 50 тонна шикі май тазартуға қауқарлы болады. Жыл сайын шамамен 9 миллион литрлік бөтелке май өндіріліп, 250-ге жуық адам жұмыспен қамтылады.
