21 қазанда Түрікменстанның Сауда-өнеркәсіп палатасында «Түрікменстан мұнайы мен газы–2026» халықаралық конференциясы және көрмесі жұмысын бастады. Іс-шара 31-рет өткізіліп отыр.
Ұйымдастырушылар — «Türkmengaz» және «Türkmennebit» мемлекеттік концерндері мен елдің Сауда-өнеркәсіп палатасы. Қатысушылар президент Сердар Бердімұхамедовтің құттықтау үндеуін тыңдап, көрмені тамашалады. Онда әлемдік отын-энергетика нарығының 130-дан астам ірі компаниясы стендтерін ұсынды.
Конференцияда әлемдік энергетика нарықтарының даму үрдістері және ынтымақтастық мүмкіндіктері, мұнай-газ кен орындарын игеру, өндіруді оңтайландыру және шетелдік инвестиция тарту мәселелері қаралды. Соның ішінде Каспий теңізінің Түрікменстан секторындағы теңіз блоктарын игеру және жаңа учаскелерде бұрғылау жұмыстарын жандандыру талқыланды.
