Алматы облысында жалпы құны 19,3 млрд теңге болатын екі инвестициялық жоба жүзеге асырылып жатыр. Олар көкөніс өсіруді, ауыл шаруашылығы өнімдерін сақтауды және астық логистикасын дамытуға бағытталған.
Ең ірі жоба — құны 17,3 млрд теңге болатын ALATAU GREEN PRODUCTION жылыжай кешені. Оның жылдық өндірістік қуаты 4 мың тоннаға дейін көкөніс өндіруге жетеді. Кешен 16 гектар аумаққа салынып, қысқы және жазғы жылыжайлар, көшет өсіру және салат өнімдерін өндіру бөлімдері болады.
Жоба аясында жалпы аумағы 9 177 шаршы метр қойма салу көзделген. Ол 6 мың тоннаға дейін көкөністі ұзақ мерзімге және 720 тоннаға дейін жемісті қысқа мерзімге сақтауға арналған. Құрылыс жұмыстары шамамен 80% аяқталған: 4 гектар аумақта шыны жылыжайлар тұрғызылып, жерасты инженерлік желілерін тарту жалғасып жатыр. Кешенді 2027 жылы пайдалануға беру жоспарланған.
