Өзбекстан президенті Шавкат Мирзиёев Жаңа Қарши қаласын салу және Қарши магистральдық каналы бойында туристік кешен құру жобаларымен танысты.
Жаңа қалаға Самарқанд – Гузар бағытындағы А-378 тасжолы мен Шахрисабзға апаратын 4Р-79 жолының арасындағы 5 200 гектар жер бөлінген. Бұл — пайдаланылмай жатқан шөлейт және жайылымдық алқаптар. Алдын ала бас жоспар 500 мың тұрғынға есептелген.
Мирзиёев қаланы болашақта миллион адам тұратын ірі орталық ретінде жоспарлап, оны Қаршының заманауи жалғасы ету қажеттігін айтты. Мұнда облыс хокимияты мен басқа мемлекеттік мекемелерді көшіру көзделген.
Жаңа қалада конгресс-холл, концерт залдары және қонақүйлер салу жоспарланған. Қоғамдық электр көлігі, ал қажет болған жағдайда жерүсті метросы әуежай мен теміржол вокзалын қаламен байланыстыруы тиіс.
Қарши магистральдық каналы бойындағы туристік кешенге үш шақырымдық аймақ құру үшін 235 гектар жер бөлінген. Жоба төрт кезеңмен іске асады; бірінші кезеңде 30 гектар аумақта қолөнершілер қалашығы мен туристік аймақ жасау жоспарланған.
Кешен құрамында қонақүйлер, мейрамханалар, дүкендер, музей, аквапарк және балалар ойын алаңдары болады. Сондай-ақ қайықпен жүзуге болатын жасанды көл салу көзделген.
Президент жаңа қаланың бас жоспары мен туристік кешеннің мастер-жоспарын жетекші шетелдік жобалау және сәулет компанияларын тарта отырып пысықтауды тапсырды. Жобаларда қауіпсіздік, жайлылық, қолжетімділік және «ақылды қала» қағидаттары ескерілуі керек.
