Өзбекстан президенті Шавкат Мирзиёев Бұхара ауданындағы «Tekhnochem» кәсіпорнына барып, мұнай-химия кластерінің қызметімен және оны одан әрі дамыту жоспарларымен танысты.
Кластер мұнайды, газ конденсатын, нафтаны, метанолды және пиролиз дистиллятын өңдейді. Бұл — республикадағы осындай бағыттағы жалғыз кешен. Кәсіпорын 69 гектар аумақты алып жатыр, онда шамамен 500 адам жұмыс істейді.
Қазіргі қуаттары жылына 100 мың тонна пиролиз дистиллятын және 160 мың тонна нафта мен газ конденсатын өңдеуге мүмкіндік береді. Кешен отынмен қатар химия өнеркәсібіне қажетті өнім шығарады: октан-бустер бензин сапасын жақсартуға, ал еріткіштер бояу, лак, желім және тұрмыстық химия өндірісінде қолданылады.
Кластерді кеңейтудің келесі кезеңі 2028 жылдың соңына дейін іске асырылмақ. Құны 292 миллион доллар болатын жоба газ конденсаты мен нафтаны өңдеуді, ароматты көмірсутектер мен еріткіштер өндіруді қамтиды. Өңдеу қуаты жылына тағы 400 мың тоннаға өсіп, 700 жаңа жұмыс орны ашылады деп жоспарланған.
Жаңа қуаттар іске қосылған соң технологтарға, инженерлерге, химиктерге және зертхана мамандарына сұраныс артады. Осыған байланысты президент өңірдегі кәсіптік білім беру мен өндіріс арасындағы байланысты нығайту қажеттігін атап өтті.
Кәсіпорын жыл сайын мұнай-химия өнімдерін, автомобиль бензині мен дизель отынын Қазақстанға, Қырғызстанға, Тәжікстанға, Түрікменстанға, Ауғанстанға және Еуропалық одақ елдеріне шамамен 180 мың тонна көлемінде экспорттауды жоспарлап отыр. Сондай-ақ 2028–2030 жылдары 150 мың тонна сұйытылған газды өңдеу жобасы бойынша шетелдік серіктестермен келіссөздер жүргізілуде.
Президент кластердің экспорттық әлеуетін арттыру және жаңа өндіріс орындарына білікті мамандар даярлау жөнінде ұсынымдар берді.
