Жамбыл облысының әкімі Ербол Қарашөкеевтің төрағалығымен өткен аппараттық жиында мал шаруашылығы нысандарының қысқа дайындығы талқыланды. Негізгі назар жемшөп әзірлеу, қыстаулардың дайындығы және ветеринариялық қауіпсіздік мәселелеріне аударылды.
Облыстық ауыл шаруашылығы басқармасының басшысы Әбдірасыл Желеубаевтың мәліметінше, биылғы тоғыз айда өңірдегі мал басы 3,8 миллионнан 4,1 миллионға жеткен. Өсім — 300 мың бас.
Алдағы қыста облыс шаруашылықтарында 484,9 мың ірі қара, 3,5 миллион қой және ешкі, 204,2 мың жылқы және 8,6 мың түйе қыстатылады.
Биыл 3,3 миллион тонна жемшөп дайындау жоспарланған. Қазір 3,365 миллион тонна әзірленіп, жоспар 101,4% орындалды. Оның ішінде 2 млн 284,6 мың тонна шөп, 134,7 мың тонна пішендеме, 491,9 мың тонна сабан, 117,1 мың тонна сүрлем және 337,9 мың тонна құнарлы жем дайындалған.
Жалпы жоспар артығымен орындалғанымен, Мойынқұм және Т. Рысқұлов аудандарында пішендеме, ал Жамбыл, Мойынқұм және Талас аудандарында құнарлы жем дайындау жоспары аяқталмаған. Жеке қосалқы шаруашылықтарға жоспардағы 1 485,8 тоннаның орнына 1 519,7 тонна жемшөп әзірленген. Қолжетімді бағамен жеткізу үшін ауыл шаруашылығы құрылымдарымен 98 меморандум жасалған.
Қазір облыста бір бау шөп 600–700 теңге, жоңышқа 1 000–1 200 теңге тұрады. Құнарлы жемнің килограмы 110–120 теңгеден сатылады. Әкім бағаны тұрақты бақылауды және негізсіз қымбаттауды тежеуге мүмкіндік беретін жемшөптің резервтік қорын құру мәселесін пысықтауды тапсырды.
Облыста мал қыстайтын 5 862 орын бар, оның 1 020-сы шалғай жайылымдарда орналасқан. Ербол Қарашөкеев әр нысанның дайындығын алдын ала тексеріп, жол, байланыс, су, отын және жемшөп қорының жайын анықтауды, вакцинацияны маусым басталғанға дейін аяқтауды тапсырды. Шалғай шаруашылықтарға мобильді ветеринариялық топтар жасақталып, биотермиялық шұңқырлар талапқа сай болуы керек.
Әкім мал ұрлығына қарсы алдын алу рейдтерін күшейтіп, ветеринариялық қызметтермен бірге мал тасымалын бақылауды тапсырды. Сондай-ақ жауапты адамдарға жемшөп дайындауды аяқтау, жеке қосалқы шаруашылықтардың нақты қажеттілігін анықтау және қыстауларға апаратын жолдарды қардан тазалайтын техника мен мердігерлерді алдын ала белгілеу міндеттелді.
