Алматы облысының Талғар ауданындағы Тұздыбастау ауылында салынған тұрғын үйлерден әлеуметтік осал санаттағы 26 отбасыға пәтер берілді. Кілттерді тапсыру рәсіміне облыс әкімі Чингис Аринов қатысты.
Қазір Талғар ауданында 9 мыңнан астам азамат тұрғын үй кезегінде тұр. Жыл басынан бері ауданда 259 адам баспаналы болды. Бұдан бөлек, 72 отбасы бюджет қаражаты есебінен жеңілдетілген несие шарттарымен тұрғын үй алды.
Салтанатты жиында Чингис Сайранұлы жаңа қоныс иелерін құттықтап, оларға амандық пен бақыт тіледі. Ол халықты қолжетімді баспанамен қамтамасыз ету маңызды міндет екенін және бұл бағыттағы жұмыстың қарқыны бәсеңдемейтінін айтты.
