Қазақстанның Авиациялық әкімшілігі әуе сапарына дайындалып жатқан жолаушыларды қырағы болуға және күмәнді ұсыныстарға келіспеуге шақырды. Әуежайда заң талаптарын сақтау жауапкершілігі тек тиісті қызметкерлерге емес, әр жолаушыға да жүктеледі.
Қаскөйлер жолаушыларға белгісіз конвертті, сәлемдемені немесе багажды басқа қалаға не елге жеткізіп бергені үшін ақы ұсынуы мүмкін. Ішіндегі заттарды білмей тасымалдау елеулі құқықтық салдарға әкелуі ықтимал.
Мазмұны белгісіз заттар мен сәлемдемелерді алмау керек, тіпті ұсынысты туыстарыңыздың танысы ретінде таныстырылған адам жасаса немесе ақша ұсынса да. Жеке заттарды қараусыз қалдыруға және бөтен адамдарға багажға қол жеткізуге рұқсат беруге болмайды.
