Астанада ауыл шаруашылығы қызметкерлері күніне орай аграрлық мамандықтарда оқитын 70-тен астам студентті біріктірген республикалық «AGRO IQ: Білім және болашақ» зияткерлік квизі алғаш рет өтті. Оған 12 команда қатысты.
Финалға елдің үш жетекші аграрлық жоғары оқу орнының студенттері шықты: С. Сейфуллин атындағы Қазақ агротехникалық зерттеу университеті, Қазақ ұлттық аграрлық зерттеу университеті және Жәңгір хан атындағы Батыс Қазақстан аграрлық-техникалық университеті.
Квизді «Ұлттық аграрлық ғылыми-білім беру орталығы» коммерциялық емес акционерлік қоғамы, Біріккен Ұлттар Ұйымының Азық-түлік және ауыл шаруашылығы ұйымы (ФАО) және С. Сейфуллин атындағы Қазақ агротехникалық зерттеу университеті ұйымдастырды.
Қатысушылар агрономия, ветеринария, мал шаруашылығы, агроинженерия, цифрлық ауыл шаруашылығы және саланың басқа бағыттары бойынша сұрақтарға жауап берді. Сондай-ақ олардың эрудициясы, логикалық ойлауы, шешім қабылдау жылдамдығы және командамен жұмыс істеу қабілеті сыналды.
Бірінші орынды Қазақ ұлттық аграрлық зерттеу университетінің «Ой ордасы» командасы иеленді. Екінші орынға С. Сейфуллин атындағы Қазақ агротехникалық зерттеу университетінің «Ақыл және достары», үшінші орынға Қазақ ұлттық аграрлық зерттеу университетінің «АГРО ҚЫРАН» командасы шықты.
Жеңімпаздар мен жүлдегерлер естелік сыйлықтар және марапаттар алды. Бірінші орын алған командаға AGRO IQ ауыспалы кубогы табысталды.
Үздік қатысушылар Германиядағы ауыл шаруашылығы кәсіпорындарында өндірістік тәжірибеден өте алады. Мұндай мүмкіндік болашақ мамандарды қолдау аясында DEULA-Nienburg оқу орталығының көмегімен ұсынылды.
Ұйымдастырушылар квизді жыл сайын өткізіп, оны Қазақстанның аграрлық жоғары оқу орындары студенттерінің білім алмасу және зияткерлік сайыс алаңына айналдыруды жоспарлап отыр.
