2026 жылғы орақ науқанының қорытындысы бойынша Ақмола облысы Қазақстан өңірлері арасында астықтың жалпы түсімі бойынша бірінші орын алды. Өңір диқандары 6,3 млн тонна астық бастырды.
Жалпы егіс алқабы 5,6 млн гектар болды — бұл өткен жылмен салыстырғанда 110,8 мың гектарға көп. Жоспарланған 4,5 млн гектарға дәнді және дәнді-бұршақты дақылдар жиналды. Орташа өнімділік гектарына 14 центнер болды.
Жалпы түсімнің шамамен 90%-ын үшінші сыныпты бидай құрайды. Оның 70%-ға жуығы — ақуызы жоғары Hi-Pro санатындағы астық. Ақуыз мөлшері 17,6%-ға дейін жетеді, ал желімтек мөлшері 30–38%.
Өңірде майлы дақылдар 837,9 мың гектардан жиналды. Орташа өнімділігі гектарына 10 центнер болып, 839,1 мың тонна майлы тұқым алынды. Картоптың жалпы түсімі 168 мың тонна, көкөніс 21,4 мың тонна болды.
Орақ науқанына 14,5 мыңнан астам ауыл шаруашылығы техникасы, оның ішінде шамамен 7 мың астық комбайны тартылды. Облысқа арзандатылған 81,2 мың тонна дизель отыны қарастырылып, астық және майлы дақылдарды кептіруге қосымша 8,5 мың тонна бөлінді.
Мал шаруашылығын қыстауға дайындау кезінде 1,35 млн тонна шөп дайындалды. Бұдан бөлек, жоспардан тыс 256,8 мың тонна пішендеме, 225,7 мың тонна сүрлем және 812,7 мың тонна сабан жиналды.
Облыста жалпы сыйымдылығы 4,4 млн тонна болатын 67 астық қабылдау кәсіпорны және ауыл шаруашылығы тауарын өндірушілердің шамамен 1,5 мың қоймасы жұмыс істейді. Астық сақтау орындарының жиынтық сыйымдылығы 7,3 млн тоннаға жетеді.
Астық қабылдау кәсіпорындарына 2,7 млн тонна астық жеткізілді, оның ішінде 1,9 млн тоннасы — бидай. Бидайдың 1,6 млн тоннасы үшінші сыныпқа жатады. 2026 жылы облыстың агроөнеркәсіп кешенін дамытуға шамамен 324,8 млрд теңге қарастырылған. 2027 жылғы егіс науқанына қажеттілік толық қамтылуы үшін 539,8 мың тонна дәнді дақыл тұқымы дайындалды.
