Ақтөбеде 1 081 көшенің атауы цифрлық карталарда тексеріліп, анықталған сәйкессіздіктер жойылады. Жұмыс электрондық карталардағы мекенжай деректерін мемлекеттік тілдегі көше көрсеткіштеріне сәйкестендіруге бағытталған.
Осыған байланысты Ақтөбе облысының тілдерді дамыту басқармасының басшысы Алтынай Юнисова 2GIS және Яндекс Карталар өкілдерімен кездесті. Тараптар атауларды біріздендіру, жазу қателерін түзету және тарихи тұлғалардың есімдерін толық көрсету мәселелерін талқылады.
Кездесуде екі картографиялық сервистегі деректер мониторингінің нәтижелері таныстырылды. Тексеру барысында оң өзгерістермен қатар мемлекеттік тілдегі жазылымға, атаулардың толықтығы мен ресми көше көрсеткіштеріне сәйкестігіне қатысты кемшіліктер анықталды.
