Қазақстан Республикасының Төтенше жағдайлар министрі Мұрат Мұханов Алматыда «Құтқарушылар үйі» қызметтік тұрғын үй кешенін ашты. Сегіз құтқарушының отбасына пәтер кілттері табысталды. Жоба Қазақстан құтқарушылары қорының бюджеттен тыс қаражатына, мемлекеттік бюджет қаржысын тартпай жүзеге асырылды.
Кешен қаланың Бостандық ауданында, өрт сөндіру бөлімінің жанында орналасқан. Ол екі қабатты таунхаустардан тұрады. Әр пәтерде үш жатын бөлме, асүй-қонақ бөлмесі және санитарлық торап бар; жеке автотұрақ орындары қарастырылған. Пәтерлер жиһазбен және тұрмыстық техникамен жабдықталған, қоныстануға дайын.
Аумақта шағын футбол алаңы, балалар ойын алаңы, барбекю аймағы және отбасылық демалысқа арналған күркелер бар. Жақын жерде Batyr Team фитнес-орталығы орналасқан.
