Алматы Қытай нарығында іскерлік туризмді ілгерілетіп, корпоративтік саяхатшыларды, халықаралық конференциялар мен іскерлік іс-шараларды тартуға басымдық беріп отыр.
Осы бағыттағы жұмыс аясында қала 3–5 қарашада Бейжіңде өткен China International MICE Exchange (CIMX Beijing 2026) халықаралық көрмесіне қатысты. Visit Almaty қытайлық туроператорларға, іскерлік іс-шаралар мен корпоративтік сапарларды ұйымдастырушыларға қаланың туристік мүмкіндіктерін таныстырды.
2025 жылдың қорытындысы бойынша Алматыға Қытайдан 136 419 турист келген. Бұл алдыңғы жылмен салыстырғанда 37,6%-ға көп. Қала Бейжің, Шанхай, Гуанчжоу және Үрімшімен тікелей әуе қатынасын дамытып отыр.
Алматы халықаралық конференциялар, корпоративтік іс-шаралар мен іскерлік сапарларды қамтитын MICE-туризмді дамытуда. Қаланың артықшылықтарының бірі — іскерлік бағдарламаны таулы курорттарға барумен, жергілікті мәдениетпен, ұлттық тағамдармен және көрікті орындармен танысумен ұштастыруға болады.
Көрме кезінде Visit Almaty өкілдері қытайлық туристік нарық қатысушыларымен бірлескен бағдарламаларды дамыту, корпоративтік клиенттер арасында Алматыны таныту және халықаралық іс-шаралар өткізу мүмкіндіктерін кеңейту жөнінде келіссөздер жүргізді.
CIMX Beijing 2026 көрмесіне 41 ел мен өңірден туризм индустриясының 3 000-нан астам өкілі қатысты. Қатысушылар туристік бағыттарын кәсіби қауымдастыққа таныстыруға мүмкіндік алды.
