Алматының Жетісу ауданында білім беру және мәдени инфрақұрылым дамып жатыр. Бұл туралы Алматының өңірлік коммуникациялар қызметінде аудан әкімі Құрасбек Сәдібеков мәлімдеді.
«Келешек мектептері» ұлттық жобасы аясында Боралдай көшесінде 1 200 орындық №225 мектеп пайдалануға берілді. №112 мектепке 320 орындық қосымша корпус салынды. №43 мектепте тағы 280 орындық корпус салынып жатыр. Жұмысты 2027 жылдың соңына дейін аяқтау жоспарланған.
Құлагер шағынауданында Инновациялық шығармашылық орталығын салуға 1,26 гектар жер учаскесі белгіленді. Нысанды бастапқыда Айнабұлақ-2 шағынауданында орналастыру жоспарланған, бірақ жер учаскесі су қорғау аймағында болғандықтан, жоба басқа жерге көшірілді. Қазір жобалық-сметалық құжаттаманы түзетуге қаражат бөлу мәселесі қарастырылып жатыр.
