Астанада екі ірі медициналық инфрақұрылым жобасы аяқталуға жақын: №2 қалалық көпбейінді аурухана жанындағы қабылдау-диагностикалық кешен және №2 көпбейінді қалалық балалар ауруханасына қосымша ғимарат салу және оны реконструкциялау.
Ересектерге арналған кешен аурухананың екі корпусын науқастарды қабылдау, диагностикалау және шұғыл көмек көрсету жүйесіне біріктіреді. Онда операциялық бөлмелер, реанимация бөлімі, қарқынды терапия палаталары, сондай-ақ шұғыл диагностика мен емдеуге арналған орындар болады.
Кешен компьютерлік және магниттік-резонанстық томографтармен, сондай-ақ қан тамырларын зерттеуге арналған ангиографпен жабдықталады. Бірыңғай қабылдау бөлімінде науқастардың жағдайының ауырлығына қарай бөлу жоспарланған. Жобалық қуаты тәулігіне 900-ге дейін өтінішті құрайды.
