Астанада қысқы маусымда тұрғындар мен қала қонақтарына арналған мұз айдындары, мұз сырғанақтары және демалыс орындары ашылады. Қалалық әкімдіктің мәліметінше, қоғамдық кеңістіктерді қысқа дайындау жұмыстары жалғасып жатыр.
Есіл өзенінің жағалауында, «Сарыарқа» ауданында, соның ішінде Оқушылар сарайының маңында мұз айдындары жасалады. Ауданда 13 мұз сырғанағы орнатылады. Қысқы демалысқа арналған орындар «Көктал» саябағында, «Оқжетпес» скверінде және басқа да қоғамдық кеңістіктерде болады.
«Есіл» ауданында Abu Dhabi Plaza кешенінің маңында Astana Winter Park ашу жоспарланған. Оның ұзындығы 1,4 шақырым, ал мұз жабынының жалпы ауданы шамамен 6 мың шаршы метр болады. Мұнда келушілер мұз үстінде айналып қана қоймай, ұзын жолақпен серуендей алады.
Келушілерге жылы павильондар, коньки жалға беру, отбасылық демалыс орындары және сәндік жарық қарастырылған. Мұзды ұстап тұратын арнайы жүйе күн жылынған кезеңдерде де мұз айдынының жұмыс істеуіне мүмкіндік береді.
«Сарайшык» ауданындағы «Қазақ елі» алаңында, Жүргенов көшесінде және Президент саябағында мұз айдындары ашылады. «Алматы» ауданындағы Триатлон-саябағында ауданы 1 200 шаршы метр каток әзірленіп жатыр; мұнда коньки жалға беру, жылы демалыс аймағы, ыстық сусындар және тамақтану орындары болады.
«Алматы» ауданында қысқы алаңдар «Құмыра» локациясында, «Жерұйық» және «Жастар» саябақтарында да жасалады. «Байқоңыр» ауданында «Ататүрік» саябағында және «Жастар» сарайының жанында мұз айдындары дайындалады. Тоғыз жерде мұз сырғанақтарын, соның ішінде Өндіріс, Кирпичный, Казгородок және Қоянды саяжай алабында орнату жоспарланған.
«Нұра» ауданында мұз айдыны «Астана Арена» стадионының жанында болады. Табиғи мұздан жасалатын айдындарды суару тұрақты аяз орнаған соң басталады. Қосымша орындар мен олардың ашылу мерзімі дайындық барысына қарай хабарланады.
