Әзербайжан президенті Ильхам Әлиев 7 қарашада Қарабақ университеті клиникасының жедел жәрдем бөлімшесінің ашылуына қатысты.
Университет ректоры Шахин Байрамов және клиниканың бас директоры Самир Бабаев мемлекет басшысына бөлімшеде жасалған жағдай туралы баяндады. Жұмыс бекітілген сәулет-жоспарлау шешіміне сай жүргізіліп, инженерлік-коммуникациялық жүйелер қайта жаңартылған.
Бөлімшеде пациенттерді қабылдау, тексеру және емдеу үшін функционалдық аймақтар жасалған. Онда реанимация, балаларға арналған педиатрия аймақтары, палата, дәрі-дәрмек сақтайтын және қызметкерлерге арналған бөлмелер бар.
Бөлімше медициналық жабдықтармен және заманауи инженерлік-коммуникациялық жүйелермен жарақтандырылған. Пациенттерді медициналық көрсетілімдерге сай басқа мекемелерге жеткізу үшін реанимация және қарқынды терапия жабдығы бар жедел жәрдем көліктері қарастырылған.
Қазір клиникада 70 стационарлық төсек бар, оның бесеуі реанимацияға арналған. Жедел жәрдем бөлімшесінде қосымша 19 төсек және бес операциялық зал қарастырылған. Клиника бір мезгілде 70 стационарлық және 19 жедел жәрдем пациентіне қызмет көрсете алады.
2027 жылғы даму жоспары аясында медициналық мекемеде 230–250 қызметкер жұмыс істейді деп болжанған. Университет клиникасы медициналық қызметпен қатар заманауи медициналық білім, клиникалық тәжірибе және болашақтағы ғылыми-зерттеу жұмысын біріктіретін орталық ретінде дамуды көздейді.
