2026 жылдың тоғыз айының қорытындысы бойынша Қазақстанда кәмелетке толмағандар жасаған құқық бұзушылықтар саны 6,9%-ға азайды. Оң динамика Павлодар, Шығыс Қазақстан, Атырау, Ақтөбе және Жамбыл облыстарында байқалды.
Оқу-ағарту министрлігі Ішкі істер министрлігімен бірлесіп, кәмелетке толмағандар арасындағы құқық бұзушылықтардың алдын алу жұмысын жетілдіріп жатыр. Негізгі бағыттар — құқыққа қайшы әрекеттердің алдын алу, тәуекелдерді ерте анықтау, жасөспірімдерге жеке қолдау көрсету және құқықтық мәдениетті қалыптастыру.
Оқу-ағарту министрлігі өңірлерде көшпелі мониторинг жүргізіп, профилактикалық жұмысты ұйымдастырудағы кемшіліктерді анықтайды және оны күшейту бағыттарын белгілейді.
2026–2027 оқу жылынан бастап мектептерде оқушылардың құқықтық сауаттылығы мен азаматтық жауапкершілігін дамытуға арналған міндетті курстар енгізілді. 5–7-сыныптарға арналған «Конституция негіздері» курсы азаматтардың негізгі құқықтары мен міндеттерімен таныстырады, заңға және мемлекеттік институттарға құрмет қалыптастырады.
8–11-сынып оқушылары «Заң және тәртіп» курсын оқиды. Ол құқықтық сананы дамытуға, құқық бұзушылықтың алдын алуға және қабылданатын шешімдер үшін жеке жауапкершілікті қалыптастыруға бағытталған.
Алдағы профилактикалық жұмыс 2026–2030 жылдарға арналған «Қазақстан балалары» тұжырымдамасы және Қазақстан Республикасының «Құқық бұзушылық профилактикасы туралы» заңы аясында тәуекелдерді ерте анықтау, кәмелетке толмағандарға жеке қолдау көрсету және заңға бағыну мәдениетін қалыптастыру қағидаттарына сүйенеді.
