Қазақстан Республикасы Атом энергиясы агенттігінің төрағасы Алмасадам Сәтқалиев Антальяда өткен «Мировые атомные дни» конференциясы аясындағы «Атомная энергетика для людей и планеты» пленарлық отырысына қатысты.
Сөзінде ол Қазақстанның атом саласын дамыту жоспарлары туралы айтты. Үш атом электр станциясын салу елдегі электр энергиясына өсіп келе жатқан сұранысты қамтамасыз етіп, толыққанды өнеркәсіптік және ғылыми атом кластерін қалыптастыруға негіз болуға тиіс екенін атап өтті.
«Қазақстан уран қоры бойынша әлемде екінші орында және оның әлемдік өндірісінің шамамен 40%-ын қамтамасыз етеді. Біз уранды тек экспорттық тауар емес, өз энергетикамыз бен экономикамызды дамытуға арналған стратегиялық ресурс ретінде қарастырамыз», — деді Алмасадам Сәтқалиев.
Ол білікті мамандар даярлау мен адами капиталды дамытуға ерекше назар аударды. Агенттік басшысы саланы ұзақ мерзімде дамыту үшін кемінде 100 жылға жететін стратегиялық уран қорын қалыптастыру маңызды екенін де айтты.
Қазақстан атом энергетикасымен қатар ядролық технологияларды медицинада, ауыл шаруашылығында және басқа салаларда қолдануды кеңейтуді, өз технологияларын дамытуды және жетекші халықаралық серіктестермен ынтымақтастықты нығайтуды жоспарлап отыр.
Пленарлық отырысқа «Росатом» мемлекеттік корпорациясының бас директоры Алексей Лихачев, Дүниежүзілік ядролық қауымдастықтың бас директоры Сама Бильбао-и-Леон, «Узатом» агенттігінің директоры Азим Ахмедхаджаев, БРИКС атом энергиясы платформасының бас үйлестірушісі Элзи Пуле және Paks II Ltd. бас директоры әрі директорлар кеңесінің төрағасы Аттила Шагоди де қатысты.
