Қазақстанда мүмкіндігі шектеулі адамдарға денсаулық ерекшеліктері мен тұратын өңірін ескеріп, спорт түрін және секцияны таңдауға көмектесетін @parasport_kz_bot Telegram-боты іске қосылды. Сервис жаттығуды бастау үшін қажет ақпаратты бір жерге жинайды.
Ботты ҚР Туризм және спорт министрлігінің Дене мүмкіндіктері шектеулі адамдарға арналған спорттық даярлық орталығы іске қосты. Пайдаланушы өңірді, спорт бағытын және денсаулық бұзылысының санатын таңдайды. Осы мәліметтер негізінде бот сол өңірде бар спорт түрлерінің тізімін ұсынады.
Сервис арқылы спорт ұйымының менеджерімен WhatsApp-та байланысуға, оның Instagram парақшасына өтуге және 2GIS-тен спорт мектебінің мекенжайын табуға болады.
Министрлік мәліметінше, 2025 жылы заңнамада I топтағы мүгедектігі бар спортшыларға еріп жүретін адамдардың мәртебесі алғаш рет бекітіліп, олардың халықаралық жарыстарға қатысуын қаржыландыру қарастырылды.
2026 жылғы V Азия Пара ойындарында Қазақстан құрамасы 50 медаль жеңіп алды: 12 алтын, 16 күміс және 22 қола. Команда жалпы есепте тоғызыншы орын алып, 2023 жылғы ойындардағы нәтижесінен асып түсті: сол кезде қазақстандық параспортшылар сегіз алтын медаль алған.
Ербол Хамитов Италияда өткен 2026 жылғы қысқы Паралимпиада ойындарында пара биатлоннан алтын, пара шаңғы жарысынан қола медаль иеленді. Токиодағы XXV жазғы Сурдлимпиада ойындарында Қазақстан құрамасы 25 медаль алды: сегіз алтын, төрт күміс және 13 қола.
Қазақстанда мүмкіндігі шектеулі 66 мыңнан астам адам тұрақты түрде спортпен шұғылданады. Елде паралимпиадалық, сурдлимпиадалық және паралимпиадалық емес бағыттарды қосқанда, спорттың 35 түрі дамып келеді.
Ботты https://t.me/parasport_kz_bot сілтемесі арқылы пайдалануға болады.
