Қазақстанның бес облысында ауыл тұрғындарының табысын арттыруға және отбасыларға атаулы қолдау көрсетуге арналған «Ауылды дамыту командасы» пилоттық жобасы іске қосылады. Ұлттық экономика вице-министрі Бауыржан Омарбеков Түркістан облысының Сауран ауданында жаңа тәсілмен танысты.
Жоба әр отбасының қажеттілігі мен мүмкіндігін ескеріп, жеке жұмыс істеуді көздейді. Мамандар ауыл тұрғындарына жұмыс табуға, қажетті дағдыларды меңгеруге, кәсіп ашуға және табысын арттыруға жәрдемдеседі.
Жоба Түркістан, Жамбыл, Батыс Қазақстан, Павлодар және Қостанай облыстарында жүзеге асырылады. Командаларға жұмыспен қамту, кәсіпкерлік, ауыл шаруашылығы, әлеуметтік және құқықтық көмек мамандары кіреді. Олар қолдау шараларын таңдауға және оқудан, грант алудан бастап кәсіп ашуға дейінгі кезеңде отбасыларға сүйемелдеу көрсетеді.
