Қазақстанның Су ресурстары және ирригация министрлігі жалпы ұзындығы 4,6 мың шақырымнан асатын 746 каналды қайта жаңғыртып жатыр. Биыл 964 шақырымдағы жұмыстарды аяқтау жоспарланған. Бұл шамамен 200 мың гектар суармалы жердің сумен қамтамасыз етілуін жақсартуға мүмкіндік береді.
Ирригациялық желілерді жаңғырту суды тасымалдау кезіндегі шығынды азайтуға бағытталған. Кейбір жобаларда су ресурстарын дәл есепке алу үшін автоматтандыру элементтері енгізіледі.
Сонымен қатар 12 гидротехникалық нысанды қайта жаңғырту, жалпы сыйымдылығы 887 млн текше метр болатын бес су қоймасын салу және 142 елді мекенді сапалы ауызсумен қамтамасыз ету үшін 12 ауызсу нысанында жұмыс жүргізіліп жатыр.
