Төтенше жағдайлар министрлігі тауда қауіпсіздік ережелерін қатаң сақтауға шақырды. Сапар алдында маршрутты жоспарлап, ауа райы болжамын қарап, тауға шығатыныңызды және қай уақытта оралуды көздейтініңізді 112 қызметіне хабарлау қажет.
Өмірге қауіп төндіруі мүмкін, жетуі қиын аумақтардағы, судағы, таудағы және үңгірлердегі маршруттар туралы жеке тұлғалар сапарға дейін ТЖМ-нің аумақтық органына хабарлауы тиіс. Мұны 112 бірыңғай кезекші-диспетчерлік қызметінің телефоны арқылы немесе аумақтық органның ресми сайтында көрсетілген электрондық поштаға хабарлама жіберіп жасауға болады.
Хабарламада адамның тегі, аты, әкесінің аты және байланыс деректері көрсетілуі керек. Топпен сапарға шыққанда қатысушылардың бірі топтағы адамдар санын, олардың деректері мен байланыс ақпаратын, маршруттың басталатын және аяқталатын жерін, ұзындығын, сондай-ақ түнеу және демалу жоспарланған орындарды хабарлайды.
