Өскеменде заманауи медициналық жабдықтармен қамтылған Гематология орталығы пайдалануға берілді. Ол ел Президентінің тапсырмасымен мемлекетке қайтарылған қаражатқа салынған.
Орталық Шығыс Қазақстан, Павлодар және Абай облыстарының тұрғындарына күрделі гематологиялық ауруларды диагностикалау және емдеу бойынша мамандандырылған әрі жоғары технологиялық көмек көрсетеді.
Ашылу рәсіміне Қазақстан Республикасы Премьер-министрінің бірінші орынбасары Нұрлыбек Нәлібаев және Шығыс Қазақстан облысының әкімі Нұрымбет Сақтағанов қатысты.
Нысанның құрылысы 2020 жылы басталған. 2025 жылы мемлекет басшысының тапсырмасымен құрылысты аяқтауға Арнайы мемлекеттік қордан 34 млрд теңге бөлінді. Медициналық кешеннің жалпы аумағы 38 мың шаршы метрден асады.
Кешенде 148 орындық негізгі емдеу корпусы, пациенттер мен оларды алып жүретін адамдарға арналған пансионат және инженерлік жүйелердің үздіксіз жұмысын қамтамасыз ететін техникалық блок бар. Орталыққа 256 кесінділі компьютерлік томограф, қуатты ангиографиялық жүйелер және дің жасушаларын өсіруге арналған зертханалар орнатылған.
Жабдық онкогематологиялық аурулар мен қан тамырлары патологияларын дәл анықтауға мүмкіндік береді. Орталықта сүйек кемігін трансплантациялау сияқты күрделі медициналық рәсімдер де жүргізіледі.
Орталықта жұмыс істеуге 35 маман — дәрігерлер, инженерлер және медбикелер дайындалды. Олар Қазақстандағы және шетелдегі жетекші клиникаларда оқудан өтті.
