Шымкент қалалық №1 клиникалық ауруханасында екі бүйрегі де істен шыққан науқасқа бүйрек трансплантациясы жасалды. Донор оның туған ағасы болып, бір бүйрегін берді.
Науқас 10 жылдан бері қант диабетімен ауырады. Қандағы қант деңгейінің ұзақ уақыт жоғары болуы бүйрек қызметін бұзып, соңғы жылдары ол тұрақты түрде диализ қабылдаған.
Дәрігерлердің айтуынша, трансплантация бірнеше күрделі кезеңнен тұрады: алдымен донордың бүйрегін алып, арнайы ерітіндімен өңдеп, операцияға дайындайды. Содан кейін мүшені реципиенттің ағзасына орналастырып, қан тамырларына жалғайды. Операция кезінде бүйректің қанмен қамтылуы мен жұмысы мұқият бақыланады.
