QS Quacquarelli Symonds халықаралық талдау агенттігі QS Asia University Rankings 2027 рейтингін жариялады. Қазақстан Орталық Азия елдері арасындағы көшбасшылығын сақтап, өңірде үздік 100 университеттің қатарына үш жоғары оқу орны енген жалғыз ел болды. Рейтингке Қазақстанның 51 университеті кірді — өткен жылмен салыстырғанда жеті оқу орны көп.
Азияның 26 елі мен аумағынан 1722 университет қатысқан рейтингте Қазақстан ұсынылған жоғары оқу орындарының саны бойынша өңірде 10-орынға жайғасты. Соңғы үш жылда рейтингтегі қазақстандық университеттер саны 34-тен 51-ге өсті, олардың жетеуі тізімге алғаш рет енді.
Азияның үздік 100 университетінің қатарына әл-Фараби атындағы Қазақ ұлттық университеті (46-орын), Л.Н. Гумилев атындағы Еуразия ұлттық университеті (62-орын) және Satbayev University (89-орын) кірді. NU 62 сатыға көтеріліп, 139-орынға тұрақтады. Сәрсен Аманжолов атындағы Шығыс Қазақстан университеті 64 орынға жоғарылап, 618-орын алды.
Қазақстандық жоғары оқу орындары білім беру ортасының сапасы, академиялық ұтқырлық және халықаралық ынтымақтастық көрсеткіштерінде жоғары нәтиже көрсетті. Рейтингтің 11 индикаторының жетеуі бойынша қазақстандық университеттердің орташа көрсеткіші Азияның орташа деңгейінен жоғары болды.
Алмасу бағдарламасымен шетелге шығатын студенттер үлесі көрсеткішінде Қазақстанның орташа балы 58,8 болды, ал Азия бойынша бұл көрсеткіш 22,6 балды құрады. Оқытушылар мен студенттер арақатынасы бойынша қазақстандық университеттер орта есеппен 52 балл жинады, Азиядағы орташа көрсеткіш — 34,6 балл. Жұмыс берушілер арасындағы бедел бойынша Қазақстанның нәтижесі 38,8 балға жетіп, Азияның 24,9 балдық орташа көрсеткішінен асты.
Рейтингтің жекелеген индикаторларында да қазақстандық университеттер жоғары орындарға ие болды. Әл-Фараби атындағы ҚазҰУ оқытушылар мен студенттер арақатынасы және алмасу бағдарламасына қатысатын студенттердің үлесі бойынша Азияда 12-орын алды. Е.А. Бөкетов атындағы Қарағанды ұлттық зерттеу университеті соңғы көрсеткіште 29-орыннан 18-орынға көтерілді.
NU халықаралық ғылыми ынтымақтастық индексі бойынша 24-орынға, шетелдік оқытушылар үлесі бойынша 26-орынға шықты. Соңғы көрсеткіш бойынша Satbayev University 34-орында, ал әл-Фараби атындағы ҚазҰУ 52-орыннан 40-орынға көтерілді. Оқытушылар мен студенттер арақатынасы бойынша 10 қазақстандық университет, алмасу бағдарламасына қатысатын студенттер үлесі бойынша алты және шетелдік оқытушылар үлесі бойынша жеті университет Азияның үздік 100 қатарына енді.
Қазақстандық университеттердің халықаралық оқытушылар үлесі көрсеткіші 48%-ында жақсарған, ал оқытушылар мен студенттер арақатынасы 39%-ында өскен. Қазақстанда шетелдік университеттердің 30-дан астам филиалының ашылуы білім беру бағдарламаларын дамытуға, академиялық ұтқырлыққа және халықаралық байланыстарды нығайтуға қосымша мүмкіндік береді.
QS Quacquarelli Symonds аға вице-президенті Бен Саутер Қазақстанның Орталық Азиядағы жетекші орнын сақтап келе жатқанын атап өтті. Оның айтуынша, NU-дың Азияның үздік 200 университеті қатарына енуі ғылыми зерттеулер мен интернационалдандыруды қолдаудың маңызын көрсетеді; ғылымды қаржыландыруды арттырумен қатар зерттеулердің халықаралық ықпалын күшейту міндеті тұр.
QS аймақтық директоры Сергей Христолюбов рейтингке Қазақстанның 19 қаласынан 51 университет енгенін айтты. Ол Алматы мен Астананың QS Best Student Cities 2027 әлемнің үздік студенттік қалалары рейтингіндегі орындарының жақсаруы Қазақстанның халықаралық білім беру орталығы ретіндегі танымалдылығы артып келе жатқанын көрсететінін атап өтті. QS Asia University Rankings университеттерді академиялық бедел, жұмыс берушілер бағасы, білім беру ортасы, ғылыми нәтижелілік, халықаралық ынтымақтастық және академиялық ұтқырлықты қамтитын 11 индикатор бойынша бағалайды.
