Қытайда Қазақстан Су ресурстары және ирригация министрлігі мен China Energy International Group компаниясының ынтымақтастығы аясында «Ақылды су шаруашылығы» бағдарламасы бойынша қазақстандық 14 маманның алғашқы легі оқи бастады.
Мамандар Қытайдың гидротехникалық құрылыстарды салу және пайдалану тәжірибесін, сондай-ақ су ресурстарын басқаруда цифрлық технологияларды қолдануды зерделейді. Бағдарламада «Үш шатқал» және «Гэчжоуба» гидротораптарына барып, ірі гидротехникалық құрылыстарды пайдалану және басқару тәжірибесімен танысу қарастырылған.
Сонымен қатар, «Қазсушар» РМК мен Power China International Group Limited компаниясы арасындағы өзара түсіністік және ынтымақтастық туралы меморандум аясында Қытайда су саласының тағы 9 қазақстандық маманы оқып жатыр. Оқудың шығынын Қытай тарапы көтереді.
Семинарда суды тазартудың заманауи технологиялары мен су ресурстарын тиімді пайдалану жолдары қарастырылады. Оқу Сучжоу ғылым және технологиялар университетінде өтіп жатыр. Мамандар Қытай кәсіпорындарының тәжірибесін зерделеу үшін Ханчжоу және Шанхай қалаларына да барады.
Су ресурстары және ирригация вице-министрі Талғат Момышев мамандарды даярлау кезінде су шаруашылығы саласының қазіргі міндеттерін ескеру маңызды екенін айтты. Оның сөзінше, Қытайдағы бағдарламалар заманауи технологиялар мен ірі гидротехникалық құрылыстарды пайдалану тәжірибесін үйренуге мүмкіндік береді; алынған білім Қазақстандағы су ресурстарын басқару тиімділігін арттыруға жұмсалмақ.
Министрліктің мәліметінше, бұған дейін мамырда су ресурстарын кешенді басқару бойынша 34 қазақстандық маман оқудан өткен. Соңғы екі жылда Қытайдағы оқуға барлығы 206 қазақстандық су маманы қатысқан: 2025 жылы — 125 адам, ал 2026 жылы Power China бағдарламасы бойынша — 67, China Energy International Group бағдарламасы бойынша 14 маман.
Су ресурстары және ирригация министрлігі мен Power China және China Energy International Group компаниялары 2027 жылы мамандарды бірлесіп қайта даярлауды жалғастыруды жоспарлап отыр.
