Палестинадан келген студенттердің алғашқы тобы Көкшетауға жетті. 13 студент Қазақстан Республикасы Ғылым және жоғары білім министрлігінің «Study in Kazakhstan» бағдарламасы аясында Ualikhanov University-де білім алады.
2026–2027 оқу жылында бағдарлама бойынша университетке Индонезия, Таиланд, Палестина, Ауғанстан, Пәкістан және басқа елдерден 80-нен астам шетелдік студент қабылданған. Олардың көбі университеттің Жоғары медицина мектебінде «Медицина» білім беру бағдарламасы бойынша оқиды.
Университет студенттерді қарсы алып, жатақханадан орын берген. Қазір қажетті құжаттар рәсімделіп, студенттерді оқу үдерісіне бейімдеу жұмыстары жүргізіліп жатыр.
Жаңадан келген студенттерге университеттің оқу инфрақұрылымы таныстырылып, Жоғары медицина мектебінің басшылығымен кездесу өткізілді. Кездесуде оқу үдерісін ұйымдастыру тәртібі, білім беру бағдарламасының ерекшеліктері, академиялық талаптар және студенттерге көрсетілетін қолдау шаралары түсіндірілді.
Университет психологының қатысуымен арнайы семинар да ұйымдастырылды. Онда студенттерге Қазақстандағы өмірге және жаңа академиялық ортаға бейімделу, мәдениетаралық байланыс және психологиялық қолдау алу мүмкіндіктері туралы кеңес берілді.
«Study in Kazakhstan» бағдарламасы шетелдік студенттерге сапалы білім алуға жағдай жасауға, олардың әлеуметтік және академиялық бейімделуіне және жоғары білім саласындағы халықаралық ынтымақтастықты кеңейтуге бағытталған.
